Då Andrei Arlovski møtte Fedor Emelianenko i 2009 åpna han kampen friskt med slag- og sparkkombinasjonar som pressa Fedor mot ringen. Det såg lenge ut som Arlovski kunne bli den første til å detronisere den ubestridte russeren og bli historisk. Men då Arlovski prøvde eit flygande kne med guarden nede var det heile brått over. Fedor knocka ut Arlovski i eit augeblikk som blei foreviga av fotografar. Det var også eit augeblikk som var starten på ei karrieremessig mørk periode som holdt på å ta knekken på kviterussaren.

Sjekk ut videopakken for UFC 195 her

Snuoperasjon

Med fleire stygge knockouttap etter Fedor-oppgjeret hevda mange at epoka til den kviterussiske veteranen på toppnivå var over. Han fekk det notoriske “glasskjeve”-stempelet, og gjekk kampar for små organisasjonar. Men, etter ein vanvittig snuoperasjon er han tilbake blant kremen av tungvektarar. 

Om “Cryogenic therapy” har vore nøkkelen for comebacket til Andrei Arlovski, er heller usikkert.

Mykje av æra kan rettast til det renommerte og meisterlege trenarapperatet beståande av Mike Winkeljohn og Greg Jackson, som blant anna har Holly Holm, Jon Jones og Alistair Overeem på kundelista si. Desse har omprogrammert Arlovski frå å vere ein hensynslaus våghals til å bli ein meir kontringsorientert og tolmodig striker. Effekten har vore markant: Arlovski har holdt seg knockoutfri på heile 5 år, vunne 11 av dei 12 siste kampane, og er tilbake som ein av UFCs beste tungvektarar.

Kampen mot knockoutspøkelset

Men knockoutspøkelset som tidlegare har vore eit stort hinder for den gode boksaren med den gjenkjennbare aust-europeiske aksenten lurar framleis i skuggen. Mot Travis Browne, som vi kåra til ein av årets kampar i 2015, dominerte Arlovski den høgreiste amerikanaren heilt fram til Browne slengte eit desperat og vilt slag som holdt på å slå Arlovski ned i canvasen. Men ettersom Browne var i såpass dårleg forfatning, klarte han ikkje å kapitalisere då Arlovski blei rysta. Arlovski kom seg på beina og avslutta endeleg den hardtslåande motstandaren.

Nettopp hardtslåande er beskrivande for motstandaren som har vunne mot Arlovski via knockout. Fedor Emelianenko, Sergei Kharitanov og Brett Rodgers har tufta karrierene sine på å vere avsluttarar, ofte via spektakulære knockouts. Det er heller ikkje unaturleg at knockouts skjer i tungvekt. Sjølv “udødelege” Mark Hunt og Roy Nelson har tapt via knockout. Ein kan difor hevde glasskjevestempelet Arlovski har hatt har vore noko ufortjent. 

Octagon- og twitterkonge

Ein som i alle fall har planar om å teste haka til ‘the pitbull’ er den amerikansk-kroatiske Stipe Miocic. Miocic, som vekslar mellom å vere ein svært hardhaus tungvektar i octagonet og ein “likandes kar” på twitter med mange mange komiske, smarte og uhøgtidlege tweets, gjor det svært få har gjort før: Gått ein fem runders sluggerfest med Junior dos Santos og stoppa Mark Hunt med slag. Med berre to tap på sine ni kampar i UFC har han etablert seg som ein av dei aller beste i den elles tynne tungvektsdivisjonen.

[wakes up] [checks twitter] [sees random guy telling me to fuck off] [calls mom to tell her I made it] pic.twitter.com/99CYAw3KyH

— Stipe Miocic (@stipemiocicufc) 16. desember 2014

Den korte veg til tittelkamp i tungvekt

Sjølv om den 35 år gamle Arlovski berre er to år eldre enn Stipe Miocic, er dette i stor grad ein kamp mellom den gamle og den nye garde. Der Miocic debuterte som proff i 2010, starta Arlovski si proffkarriere over ti år tidlegare – ein aprildag i 1999. For den tidlegare UFC-meisteren er dette i større grad den siste togturen mot tittelbeltet enn kva det er for Miocic, som på papiret har fleire MMA-år og togturar framfor seg.

Om Arlovski kjem sigrande ut av kampen mot Miocic er mykje lagt til rette for at han møter vinnaren av Fabricio Werdum og Cain Velasquez, ettersom han då vil ha svært imponerande 7 sigrar på rad. Ein kamp mellom Arlovski og Overeem er meir utenkjeleg då begge to er treningspartnarar under Jackson-Winkeljohn.

Blir Miocic kåra til vinnaren havnar han mest sannsynleg bak Alistair Overeem i den tynne tungvektskøa, ettersom Overeem vann på imponerande vis mot dos Santos.

Kampfakta

Andrei Arlovski

• 25-10, rangert som #2 i tungvekt
• Svært god striker
• knockoutkraft
• Godt fotarbeid
• Atletisk
• God defensiv bryting

Stipe Miocic

• 13-2, rangert som #3 i tungvekt
• Sterk brytebakgrunn
• Likar å bokse, ofte i volum
• Rask for tungvekt
• Svært god kardio
• God toppkontroll på bakken

Kampforløp

Eit av Andrei Arlovski sitt største våpen er ikkje berre hans bokseferdigheiter: Med hjelp av god defensiv bryting har han for vane å diktere kvar kampen skal gå. Akkurat det kan vere avgjerande mot den brytesterke Miocic. På bakgrunn av dette er det ikkje usannsynleg at kampen vil utvikle seg til ei ståande batalje. Her vil ein kontringshissig Arlovski ta i bruk ein plagsomme jab som han ofte brukar på å sette opp sin potente strake høge som blant anna gjor ende på Antonio Silva og Travis Browne. Men Miocic vil gi han ein tøff kamp då han sjølv er på boksenivå med kviterussaren. I tillegg til kjappe hender, god jab og ein farleg krok har han eit svært bevegeleg fotarbeid til å sette opp slaga. Miocic tåler også meir juling enn Arlovski og har ein solid kondisjon i takt med sitt høge tempo. 

Samstundes kan ein ikkje fråskrive støtteapperatet til kviterussaren. Greg Jackson og Mike Winkeljohn går kanskje inn som årets beste trenarteam med sine famøse kampplanar. I tillegg er det ikkje negativt å trene med Jon Jones og Alistair Overeem.